🌱“Тұлғатану. Тау тұлғалы Қаныш” атты тағылымы мол әдеби кездесу өтті

Биыл қазақтың біртуар тұлғасы, көрнекті ғалымы, Қазақ Ғылым академиясының негізін қалаушы Қаныш Сатпаевтың туғанына 125 жыл толды. Атаулы дата қарсаңында Зияткерлік білім ордасында “Тұлғатану. Тау тұлғалы Қаныш” атты әдеби кездесу өтті.

Қайраткердің өмір жолы жайлы жарық көрген бірқатар кітаптардың ішінде "Жас Қаныш", "Қаныштың жастық шағы", "Ғылыми майдан" туындыларын 7І, 11І, 11К, 11М сынып оқушылары сыныптан тыс оқыған болатын. Ғалымның балалық шағынан бастап оқу білімге құштар болған жастық жолы мен ғылыми майдандағы өрелі өмірі суреттелетін кітаптарды оқыған ұстаздар мен оқушылар үшін бұл кездесу тағылымы мол басқосу болғаны анық.

“Қаныштың жастық шағы" кітабын оқыған 7-сынып оқушылары өз әсерін "Сөздегі сурет" әдісімен өрнектесе, "Жас Қаныш", "Ғылыми майдан" кітаптарын оқыған 11-сынып оқушылары "Қаныштың балалық шағындағы hard skills ғалым болып қалыптасуына қалай әсер етті?", "Қаныштың 20 ғ.б гендерлік теңдікке араласуы", "Әкесі Имантайдың Қанышты оқуға берудегі басты қағидалары" секілді тақырыптарда TEDx форматында сөйледі. Зияткерлердің сыныптан тыс кітап оқуды академиялық біліммен ұштастыра алуы сыни ойлау дағдыларын шыңдауға, жалпыадамзаттық құндылықтарды сіңіруге жол көрсеткені аңғарылды. Басқосу соңы кітапты оқыған барлық оқушылар үшін шағын викториналық сұрақтарға жауап берумен аяқталды.